信主的心路歷程

在十幾歲，村裡常有老人逝去，自己亦覺恐懼，好想知道死後會怎樣？往哪裡去？但常聽人說：「人死後會變成鬼，廟裡的神仙會統領鬼。」為咗證實有冇鬼？我深夜獨自在墳場走動，希望會見到鬼，如果見到鬼，我會好高興，會覺得死後仲有後續。可惜的是我從來未撞過鬼和神仙，自此，我好相信世上沒有鬼和神，也從來沒有同任何宗教有交集。在街上見到教會門口的大招牌，上面寫著「信主，你和你一家必得救」之類的大字，心裡覺得是無稽之談，儍佬！

一個咁嘅人又點解會信上帝？回想起近二、三十年，神好似一直在我身旁。

我第一個引路人是我一個朋友，佢帶我去紅館聽佈道會，其後亦多次到教會崇拜，對教會開始有一點點印象，但無乜大感覺，也沒有繼續落去。又過咗十年，另一引路人又出現，又是一個朋友，邀請我到教會，之後多次參加教會的活動，同樣無乜感覺，一段時間之後無再去。但是通過去教會，真理的種子已在我心內萌芽，二十多年間，我特意同好多基督徒傾談，向他人了解，心裡面慢慢有咗一種感覺，身旁有一個咁大能慈愛的神，唔好錯過，要近些再感受下。我第一次祈禱，是家父在醫院彌留時，我求上帝幫下老豆，安祥地跨過這一步，第二天，老豆在無痛苦中離世。我細佬在大陸犯官非，當時的情況是唔死都重判，根本睇唔到出路，無計可施之下，我再求上帝幫忙，仲話若能解決，我一定信主，結果係交了保釋金得釋放，當時我心裡十分感謝上帝，但依然沒有決志。

2016年，我一個徒弟介紹我識恩明，佢又叫我返荃浸，因我一路都有一種欺騙上帝的內疚，所以在荃浸幾次崇拜之後決志信主，並完成受浸要求的幾個課程。在恩明身上，我見到神的大能和慈愛，相信通過在教會的薰陶，自己多作靈修，真心相信，全心托付，感謝神賜平安和喜樂。

回望幾十年，我一個普通人，神竟然安排咁多使者，使我同神一路保持關係，只是自己一時不察，我都常問自己，點解撞到咁多信耶穌嘅人。現在做事都有種感覺：神望住你，不可亂嚟。期望信仰的幼苗長成一棵小樹，感謝神！