係分享見證前我想先向帶我認識天父嘅好姊妹講聲對唔住，非常感謝佢讓我認識天父，但我無好好對呢位姊妹，心裡一直覺得愧疚佢，呢位姊妹可以話係對我不離不棄，我愛妳。
   而我對天父一樣，天父一直都無離棄我，係我自己選擇性親近主。記得中學畢業後，姊妹叫我返教會，我心底係相信，但心裡有種種原因未有決志，返左一段時間，係一次崇拜後我突然有一刻感動我決志了。當時雄心壯志以為自己信主後會有好明顯嘅變化，但好快就唔想返教會，要好早起身丫，好攰唔想去丫，融入唔到教會，藉口一堆，選擇性咁遵從天父嘅吩咐，唔拜其他偶像，表面上仁愛謙卑，事實上心底裡會嫉妒其他人，做啲踩界犯法野，之後同天父嘅關係，都係有事鍾無艷，無事夏迎春。。。
   由小朋友出左世直到2021，我地夫妻關係愈來愈差，對生活教養上都有分歧，最後搞到悲劇收場，當時我唯一諗起嘅幫助就係天父，不斷祈求天父幫助，賜平安、智慧、能力我去處理一堆事情，處理家事，生活上嘅安排同照顧，日常生活嘅費用，通通都要處理，剛剛又係小朋友入讀幼稚園，都有一埋事要忙，不過呢一切都好快平靜過嚟，身邊有好多唔同嘅天使嘅幫助，令我可以安頓落嚟，然後一步步再重新認識，修補我同天父嘅關係。呢一兩年短短嘅時間我感受到天父揀中而且無放棄我，感受到天父對我嘅愛同幫助，天父真係有聽到我嘅祈禱。以前覺得祈極都係無用，都唔係即時有答案就算比左答案我又唔知係唔係真，係我覺得最艱難時，我真係諗唔到點解仲要讚美感恩，因為真係咩都諗唔到，感恩有氣息，但我果時想死，有氣息又有咩用呢？
   重新再返教會認識主，令我覺得日子係艱難但有平安有依靠，天父讓我認識到自己嘅不足，最後我確信祈禱天父真係有聽到，我嘅祈禱經過10年後天父比左答案我，我真係好感恩。